newskarachi 
خیبر پختون خوا کے علاقے بٹگرام میں چئیرلفٹ میں بچوں کے پھنسنے کے واقعے پر چئیر لفٹ کے مالک اور آپریٹر اعجاز کو گرفتار کر لیا گیا۔
تھانا الائی کی پولیس نے مالک گل زرین اور اعجاز کو گرفتار کیا اور دونوں کے خلاف غفلت برتنے کا مقدمہ درج کر لیا۔
پولیس کے مطابق نجی چیئر لفٹ کے مالک کو حراست میں لینے کے بعد مزید تحقیقات کی جا رہی ہیں۔ ضلعی انتظامیہ نے چیئر لفٹ کے کمروں کو بھی تالے لگاکر سیل کردیا۔
ڈی آئی جی ہزارہ ڈویژن طاہر ایوب کا کہنا ہے کہ چیئرلفٹ کے کنٹرول روم کو سیل کردیا ہے، ایف آئی آر میں کوتاہی برتنے کی 5 دفعات شامل کی گئی ہیں۔
واضح رہے کہ گزشتہ روز بٹگرام میں چیئرلفٹ رسی ٹوٹنے کی وجہ سے ہوا میں معلق ہوئی تھی اور اس میں پھنسے 8 افراد کو ریسکیو کیا گیا تھا۔
بالاکوٹ میں متعدد چیئرلفٹ سیل، دیہاتوں کا رابطہ منقطع، عوام کا احتجاج
علاوہ ازیں ڈپٹی کمشنر کے حکم پر بالاکوٹ کے مختلف مقامات پر نصب 9سے زائد چیئر لفٹ/ڈولی کو سیل کردیا گیا جس کے نتیجے میں درجنوں دیہاتوں کا رابطہ منقطع ہوگیا۔
کیوائی کے مقام پر دریائے کنہار پر نصب چئیر لفٹ کی بندش سے پرور کے عوام بشمول دریا پار کرکے اسکول جانے والے بچے اور اساتذہ بھی محصور ہوگئے۔ پرور کے لوگوں نے احتجاج کرتے ہوئے ڈولی کی بحالی کا مطالبہ کیا۔
سید منیر شاہ سابق ناظم کا کہنا ہے کہ پرور کے مقام پر دریائے کنہار پر نصب ڈولی دریا سے تین ہزار فٹ بلندی آٹھ سو فٹ لمبی ہے۔
