نگراں وزیراعظم انوار الحق کاکڑ نے کہا ہے کہ ریاست پاکستان دہشت گردی کے خلاف جنگ جیت چکی ہے۔
بدھ کو ڈیرہ اسماعیل خان دہشت گرد حملے میں زخمی ہونے والے افراد کی عیادت کے بعد گفتگو کرتے ہوئے وزیراعظم کاکڑ نےدہشت گرد کوئی بھی حربہ استعمال کر لیں کامیاب نہیں ہوں گےانہوں نے کہا کہ ملک کے تحفظ کے لیے زخمی ہونے والے جوانوں کے حوصلے بلند ہیں۔ ’میں ان کو حوصلہ دینے کے لیے آیا ہوں لیکن ان جوانوں نے مجھے حوصلہ دیا ہے اور یہ جوان زخمی ہونے کے باوجود دشمن کا مقابلہ کرنے کا عزم رکھتے ہیں۔‘ انہوں نے کہا کہ حملہ آوروں کو خبردار کر رہا ہوں کہ وہ یہ جنگ ہار چکے ہیں، ریاست پاکستان یہ جنگ جیت چکی ہے، وہ ہاری ہوئی جبکہ ہم جیتی ہوئی جنگ لڑ رہے ہیں۔ وزیراعظم نے کہا کہ علماء حق ریاست اور امن کے ساتھ کھڑے ہیں۔ ’دہشت گرد ہمیں موت سے خوفزدہ اور ڈرا نہیں سکتے، دہشت گردی کے خلاف جنگ میں ہزاروں پاکستانیوں نے اپنی جانیں قربان کی ہیں اور ہم مزید قربانیوں کیلئے بھی تیار ہیں، دہشت گرد حملوں کا آگے بڑھ کر منہ توڑ جواب دیں گے۔‘ اس موقع پر انہوں نے دہشت گرد حملہ میں زخمی ہونے والوں کی عیادت بھی کی۔